Македонија
4. April 2020 - 13:44

Нема прекршување на полицискиот час во Дебар и Центар Жупа, безбедносната состојба стабилна

Стабилна е безбедносната состојба на подрачјето на општините Дебар и Центар Жупа, каде е прогласена кризна состојба.

-На подрачјето на двете општни, кои со својата активност ги покрива Одделението за внатрешни работи, не се забележани прекршувања на полицискиот час, ниту, пак, групни собирања на јавни места, нема нарушувања на јавниот ред и мир и нема регистрирани сообраќајни незгоди. Во Дебар евидентирани се три нови лица во самоизолација, изјави Стефан Димоски,портпарол на Секторот за внатрешни работи од Охрид.

Според Димоски во рамки на предвидените мерки во оперативниот план, полициските службеници ги реализираат мото-патролите низ градските средини и приградските населби. Непречено се одвива процесот на извлекување на лицата кои во изминативе 14 дена беа во самоизолација, а денеска, од Дебар ќе биде извршен спровод на две лица.

-Во општините Дебар и Центар Жупа успешно се спроведуваат мерките за контрола при влез на патнички и други моторни возила, како и активностите за дотурот на храна, лекови, средства за лична хигиена и други потреби за граѓаните во двете општини. Сите правни лица кои вршат дотур треба да се најават во Кризниот штаб на фиксниот телефон 046/831 051 по што, нивните возила со полициска придружба ќе бидат спроведени до соодветните трговски објекти, посочи Димоски.

Потсети дека влезот е дозволен само на лица кои се жители на општините, а истовремено е оневозможен, односно строго е забранет излезот на сите граѓани затекнати на подрачјето на двете општини.

-Упатуваме апел до граѓаните, строго да ја почитуваат одлука на Владата за забрана на движењето од 21:00 до 5:00 часот секој ден, а за време на викендите од 16:00 до 5:00 часот. Апелираме на совесно и дисциплинирано придржување до сите останати препорачани мерки и насоки во врска со спречувањето на ширењето на коронавирусот (COVID-19), а сите правни и физички лица строго да се придржуваат до насоките на полициските службеници, додаде портпаролот Димоски.

Нагласи дека граѓаните, на бесплатниот телефонски број 08 0000 201 или на 192, можат да ги пријавуваат сите случаи на лица кои ги прекршуваат одредбите за задолжителна 14-дневна самоизолација. Сите оние кои ги прекршуваат дадените препораки, ќе бидат санкционирани согласно член 205 и 206 од Кривичниот законик.