Мицкоски најавува за 50% почист воздух и целосна гасификација со бесплатен приклучок
Секое домаќинство ќе добие природен гас а поврзувањето кон гасоводната мрежа ќе биде бесплатно. Лидерот на ВМРО-ДПМНЕ, Христијан Мицкоски најавува гасификација на секое населено место во државата со изградба на магистралните цевководи Неготино-Кавадарци-Битола, Штип-Радовиш-Струмица, Свети Николе-Велес. На гасоводната мрежа е предвидено приклучување на термоелектраната Неготино, а природен гас ќе пристигне и до индустриските зони во Штип, Прилеп, Струга, Жабени.
„Еден од стратешките приоритети на новата влада на ВМРО-ДПМНЕ ќе биде да се воведе природен гас за употреба во домаќинствата, индустријата, малите и средните претпријатија, образованието, социјалните установи, здравствените установи итн. Затоа ќе го изградиме гасоводниот систем во државата. Во наредниот период со интензивна динамика ќе се пристапи кон: завршување и пуштање во употреба на проектите кои беа започнати од поранешната влада на ВМРО-ДПМНЕ, а еве гледаме на крајот од мандатот на оваа влада не се сеуште завршени“, изјави Христијан Мицкоски, Претседател на ВМРО-ДПМНЕ.
За зголемување на енергетската ефикасност на домовите, ВМРО-ДПМНЕ најавува субвенции за поставување сончеви колектори, термофасади, менување прозорци.
„Фактичката состојба покажува дека многу од домовите на граѓаните се енергетски неефикасни, или воопшто немаат фасада, а нивната обнова пак или изградба на фасада чини пари. Затоа се обврзувам дека идната влада на ВМРО-ДПМНЕ ќе финансира половина од трошоците за изградба на нова енергетска фасада и замена на ефикасен оков во домовите. Со оваа мерка ќе се намали непродуктивното користење на енергијата, а тоа пак ќе придонесе за заштита на животната средина“, вели Мицкоски.
Од партијата велат дека овие проекти ќе овозможат намалување на загаденоста во воздухот за 50 проценти а дополнително се предвидени инвестиции во екологијата.
За подобрување на електроенергетскиот систем на државата, Мицкоси најавува изградба на нова термоелектрана во Малешевијата која ќе работи според највисоки еколошки стандарди во која е предивдено да се отворат 1000 работни места.
-
Зоран Јаневски
Сите содржини од овој новинар