Македонија остана без ковид вакцини

Утре истекува и продолжениот рок на 250.000 -те вакцини Фајзер со кои во моментот располага државата. По препорака на производителот наместо во јуни, тие досега останаа во вакциналните пунктови и беа единствениот избор за оние кои сакаа да се заштитат од Ковид. Иако интересот е намален сепак од јуни наваму стотина граѓани ги примиле вакцините со новиот датум на употреба.

Сепак во утрешниот ден мора да се повлечат и уништат, а државата ќе остане без вакцини.

- Во тек се активности за обезбедување и нови количини вакцини против КОВИД, одговорија од министерството за здравство.

Инаку од почетокот на пандемијата беа обезбедени вкупно 2.866.700 дози вакцини. Според податоците од ИЈЗ  искористени се околу 876.000, значи приближно 2 милиони се фрлени или допрва ќе бидат уништени.

Од вкупната количина државата од производителите купила 1.506.280 вакцини, останатите беа донации.

Досега во Агенцијата за лекови стигнале 260 пријави за несакани реакции од Ковид вакцините. Пријавите се од здравствени работници и граѓани.

• Кај помалку од 0,03 проценти кај извршените вакцинации е пријавен сомнеж за несакани реакции. Најчесто се пријавени лесни несакани реакции со лесна симптоматологија и тоа покачена температура, малаксаност, главоболка,гадење,вртоглавица,болка и оток на местото на апликација и болка во мускулите, изјави м-р Љирим Шабани, директор на МАЛМЕД.

Од МАЛМЕД велат дека сите овие реакции биле опишани во упатствата на вакцините, а посериозни комплчикации до сега кај нив не биле пријавени.