Какви се оценките за четвртиот пакет мерки на Владата?

Бизнисот задоволен од предложените владини мерки за помош на стопанството, бидејќи најголем дел од нивните барања биле прифатени. Но, очекуваат мерките бргу да се усвојат и парите веднаш да им бидат ставени на располагање на фирмите.

Тоа што овој сет мерки би требало да опфати повеќе сектори и поголем број фирми, бизнис заедниците сметаат дека ќе резултира со зголемување на ликвидноста на компаниите и ќе ја придвижи економијата во целост.

„Позитивен е пресвртот дека во дел од мерките поддршката нема да се однесува само на краткорочни мерки за санирање на последиците од кризата, туку се предвидуваат и системски реформи кои би се однесувале на целото стопанство. 
Најавеното намалување на увозните давачки за суровини и репроматеријали (измена на Царинската тарифа) е едно од приоритетните прашања за кое Комората има покренато барање да се пристапи кон ревидирање на царинските стапки.
Како втор приоритет би го истакнале предвиденото намалување или укинување на дел од парафискалните давачки", сметаат од Стопанската комора на Македонија.

Компаниите од најпогодените сектори ќе добијат и еднократна финансиска помош за покривање на загубите што ги генерираа во изминатиот период, бидејќи дел од нив имаа целосна забрана за работа. Ова се однесува на игротеките, рестораните за свадби и туристичките агенции.

“Олеснувањата во делот на отплата на кредитите и помошта за плати се клучни. Не се многу пари, но ќе завршат работа за до Нова година, а потоа се надеваме дека од јануари ќе се средат работите, регионот ќе се отвори, а ние ќе почнеме да работиме и се надеваме дека нема да има потреба од помош понатаму”, вели Ана Марија Алексова од туристичкиот сектор.

Бизнис секторот ги очекува деталите околу начинот и условите за аплицирање, но се надеваат дека нема да има промени од првично најавените критериуми, според кои финансиска помош ќе добијат фирмите со намалени приходи и зачуван број на вработени.

Четвртиот пакет содржи вкупно 31 мерка со вкупна вредност од 470 милиони евра. Освен за фирмите, дел од мерките се наменети и за помош на граѓаните, со што ќе се поттикне потрошувачката за македонски производи и услуги, а со тоа дополнително ќе им се помогне на фирмите.