Македонија
30. May 2020 - 16:38

ИВЗ доби нов поглавар кој најавува промени во заедницата

По 14 години на поглаварското столче во Исламската верска заедница во Македонија седна друг човек. Гостиварскиот муфтија Шаќир Ефенди Фетаху е новиот исламски верски лидер во земјава.

Титулата Реис ул Улема ќе ја носи до организирањето на избор за нов поглавар на ИВЗ. На својот прв ден како верски водач реисот Фетаху беше срдечно пречекан во седиштето во Скопје.

Се заблагодари на укажаната доверба, а по получасовната средба со останатите членови на верската заедница најави нова ера во организирањето на верскиот живот на муслиманите во Македонија.

“Институционалната култура е една од најважинте средства за правилно функционирање на иниституциите и во овој поглед, во иднина ќе бидат преземени конкретни чекори за реорганизација на највисоката верска институција. Наше очекување и желба е ИВЗ да биде пример за сите други институции”.

Новиот реис Фетаху дополни дека под негово водство, ИВЗ ќе биде достоинствена институција - носител на мирот, единството и просперитетот во земјата.

Како прв човек на ИВЗ доаѓа на местото на Сулејман Реџепи, кој пред неколку дена беше разрешен од Ријасетот. Реџепи во два наврати, повеќе од 20 години беше поглавар на ИВЗ, а неговото владеење често беше пропратено со контроверзи, иако по стапувањето на функцијата вети дека ќе воведе ред во организацијата.

По повод неговата смена, Реџепи се огласи со соопштение во кое вели дека ја прифаќа одлуката на Ријасетот, но оцени дека против него се водела негативна кампања.

“Последниве денови во јавноста се пласираа редица дезинформации и се одвиваше кампања која што јас ја сметам за нецивилизирана, а која се однесуваше на мојата личност, при што се изнесоа сомнежи на мојата активност и ангажирање на чело на ИВЗ. Како верски водач и човек, длабоко сум трогнат од оваа навредлива кампања, но во ниту еден момент не го оспорив правото на кој било да го изнесе своето мислење и став...”

Неофицијално, примопредавањето на функцијата е извршено вчера во ИВЗ. Засега не се знае кога ќе бидат организирани изборите за нов поглавар.