Бизнис
22. January 2021 - 21:16

Државата финансира инвертер клима уреди, но цели маала немаат струја за да ги користат

100 тина куќи во скопско Шуто Оризари веќе пет години секојдневно имаат проблеми со прекини на струјата. Сметките ги плаќаат редовно, но половина ден седат во темница. Велат во 21 век недозволиво е да живеат со свеќи.  

Велат најмногу страдаат децата. Невозможно е да следат ниту онлајн настава. Луѓето со денови не можат да вклучат машина за перење, ниту пак да зготват јадење и да одржуваат хигиена.

За проблемот одговор побаравме и од ЕВН. Од компанијата тврдат дека проблеми се појавуваат поради нелегални приклучоци.

Екипите на Електродистрибуција секој ден се на терен поради прекините на електрична енергија кои се предизвикуваат како резултат на преоптоварување на дистрибутивната мрежа. Преоптоварувањето се случува тогаш кога граѓаните нелегално се приклучуваат. Имено, по санација на еден пријавен дефект, повторно се појавува нов поради неконтролираната и нелегалната потрошувачка на електрична енергија од страна на дел од жителите на овој регион. Во текот на зимскиот период значително се зголемува потрошувачката на електрична енергија поради ниските температури како и во најголем дел поради нелегалните приклучувања и кражби на електрична енергија од страна на дел од корисниците, а со тоа се зголемуваат и проблемите на локалното население. Дивото прикл, учување и манипулациите предизвикуваат дефекти кои тешко и долго време се санираат, материјална штета и загрозување на животот и здравјето на граѓаните. Во ормари, столбови па дури и во трафостаници се забележани манипулации кои се направени од страна на жителите, се вели во дописот на компанијата.

Граѓаните револтирани велат дека тоа се само изговори. Бараат компанијата да си ја преземе одговорноста.

Во изминатиов период постојано има известувања за прекини на електричната енергија во одредени делови на градот. Инаку во август годинава струјата поскапе за 7, 4 проценти со образложение дека државните енергетски компании поради пандемијата имаат намалени приходи кои всушност се неопходни за непречно снабдување на граѓаните со струја.