Бизнис
4. September 2017 - 16:09

Бектеши предложи воспоставување авиолинија Скоје-Тел Авив

Министерот за економија Крешник Бектеши за време на неговата официјална посета на Израел, каде што беше дел од владината делегација предводена од премиерот Зоран Заев, имаше презентација на Бизнис форумот во Ерусалим на кој присуствуваа бизнисмени од Израел и Македонија.

Министерот Бектеши, како што денеска информира Министерството за економија, ги запозна присутните бизнисмени со можностите што ги нуди Министерството за економија за странски директни инвестиции во различни области како што се енергетиката, туризмот и инвестициите во слободните економски зони кои се извозно ориентирани.

За Република Македонија, рече Бектеши, израелското искуство во деловното работење е од големо значење со оглед на деловната клима што ја има оваа земја, како меѓународен фактор во производството, туризмот и особено во областа на иновациите.

- Би сакал да зборувам за неколку области, како што е енергетската ефикасност, имајќи предвид дека во Израел околу 90 проценти од домаќинствата користат сончева енергија, потоа во областа на туризмот, која исто така е високо развиена гранка во Израел, во делот на оспособување кадар кој работи во компаниите и меѓународните корпорации кои инвестирале во Израел, рече министерот Бектеши, повикувајќи ги израелските бизнисмени да дојдат во што е можно поголем број да инвестираат во Македонија и да посетуваат повеќе туристички капацитети во земјата.

Министерот Бектеши ги информираше израелските бизнисмени со трите езера  Oхридското, Преспанското и Дојранското Езеро. Ги информираше туристичките компании присутни на состанокот дека Охридското Езеро е под заштита на УНЕСКО како едно од најстарите езера во светот, а најнаселен туристички центар е охридско-струшкиот регион со капацитет од околу 40.000 кревети, со можност за инвестирање во хотели и други станбени објекти, информира Бектеши.

Бектеши, исто така, предложи воспсотавување директна авиолинија која би ги поврзувала  Скопје со Тел Авив, како и потпишување на договор во областа на туризмот.

Министерот Бекеши треба да има и билатерална средба со израелскиот министер за туризам Јарив Левин.

Министерот за економија, Крешник Бектеши, е во официјална посета на Израел, како дел од владината делегација предводена од премиерот Зоран Заев, која од 2 до 4 септември се на посета, на покана на израелскиот премиер Бенјамин Нетанјаху.

Дел од делегацијата се вицепремиерот Кочо Анѓушев, министерот за внатрешни работи Оливер Спасовски и министерот за земјоделство Љупчо Николовски.